कुरिअरच्या गाडीवर पाळत, तीन बाईकवरून पाठलाग अन् कोयत्याच्या धाकाने कोट्यवधींची लूट!

सातारा पोलिसांची थरारक कारवाई; १२ तासांत आठ दरोडेखोरांना बेड्या, १ कोटी ५५ लाखांचा मुद्देमाल हस्तगत

सातारा : सकाळची वेळ… पुण्याहून कोल्हापूरच्या दिशेने निघालेली कुरिअर कंपनीची पिकअप… गाडीमध्ये कोट्यवधी रुपयांचे सोन्या-चांदीचे दागिने… अन् या गाडीवर आधीपासूनच नजर ठेवून असलेली दरोडेखोरांची टोळी! खेड शिवापूरपासून सुरू झालेला पाठलाग कापूरहोळपर्यंत पोहोचला आणि अखेर वाई तालुक्यातील कवठे गावच्या हद्दीत राष्ट्रीय महामार्गावर दरोडेखोरांनी डाव साधला. तीन मोटारसायकलींवरून आलेल्या आठ जणांनी पिकअप अडवली. चालकाला कोयत्याचा धाक दाखवला, मारहाण केली आणि मागील दरवाजा उघडून सोन्या-चांदीचे दागिने व चांदीच्या विटा घेऊन पोबारा केला.

मात्र, पोलिसांच्या तपासापासून दरोडेखोरांना फार काळ दूर राहता आले नाही. सातारा स्थानिक गुन्हे शाखेने सीसीटीव्ही फुटेज, तांत्रिक विश्लेषण आणि खबऱ्यांच्या माहितीच्या आधारे या दरोड्याचा अवघ्या १२ तासांत छडा लावत आठ जणांना बेड्या ठोकल्या. त्यांच्याकडून तब्बल १ कोटी ५५ लाख २७ हजार २५८ रुपये किमतीचे सोन्या-चांदीचे दागिने आणि चांदीच्या विटा हस्तगत करण्यात आल्या. एखाद्या क्राइम थ्रिलर चित्रपटाला साजेशी वाटणारी ही घटना प्रत्यक्षात घडली असून, पोलिसांच्या वेगवान तपासामुळे दरोड्याचा थरारक घटनाक्रम उघड झाला आहे.

कुरिअरच्या गाडीची आतली खबर; टोळीने आखला लुटीचा डाव!

या दरोड्यामागे केवळ रस्त्यावर अचानक केलेली लूट नव्हती, तर कुरिअरच्या गाडीच्या वाहतुकीची माहिती मिळवून आखलेला कट असल्याचे तपासात समोर आले आहे.

पोलिसांनी दिलेल्या माहितीनुसार, गोपीनाथ तानाजी कदम हा कराड येथील कुरिअर कंपनीत कामाला होता. त्यामुळे पुणे आणि कोल्हापूरदरम्यान पिकअप गाडी कधी ये-जा करते, याची त्याला माहिती होती. १६ ऑक्टोबर रोजी पुण्याहून कोल्हापूरला जाणाऱ्या पिकअपमध्ये सोन्या-चांदीचे दागिने असल्याची माहिती त्याने मंगेश एकनाथ जाधव याला दिली. याच माहितीवरून पुढील डाव आखण्यात आल्याचा संशय तपासात स्पष्ट झाला.

त्यानंतर आठ जणांनी एकत्र येत पिकअप लुटण्याचे नियोजन केले. कोणत्या मार्गावर पाठलाग करायचा, गाडी कुठे अडवायची आणि मुद्देमाल कसा ताब्यात घ्यायचा, यानुसार आरोपींनी हालचाली केल्याचे पोलिसांच्या तपासात निष्पन्न झाले.

खेड शिवापूरपासून पाठलाग; कापूरहोळमध्ये आणखी साथीदार सहभागी

१६ ऑक्टोबर रोजी सकाळी सातच्या सुमारास मार्क एक्सप्रेस कुरिअर कंपनीची महिंद्रा बोलेरो पिकअप (एमएच ०९ एफएल ५४२३) पुण्याहून कोल्हापूरच्या दिशेने निघाली होती. आरोपी ऋतिक कदम आणि आदित्य कदम यांनी पल्सर मोटारसायकलवरून खेड शिवापूर टोलनाक्यापासून पिकअपचा पाठलाग सुरू केला.

दरम्यान, कापूरहोळ येथून सोमनाथ गोडसे, मंगेश जाधव आणि निखील कदम हे युनिकॉर्न मोटारसायकलवरून, तर निषीध साबळे आणि अक्षय मोझर हे होंडा शाईन मोटारसायकलवरून पाठलागात सहभागी झाले.

तीन मोटारसायकलींवरून पिकअपच्या हालचालींवर नजर ठेवत टोळी कवठे गावच्या हद्दीत पोहोचली. राष्ट्रीय महामार्ग क्रमांक ४८ वर योग्य संधी मिळताच आरोपींनी पिकअपसमोर मोटारसायकल आडवी घातली आणि गाडी थांबवली.

कोयत्याचा धाक, चालकाला मारहाण अन् क्षणात मुद्देमाल गायब!

पिकअप थांबताच मंगेश जाधव याने चालकाला कोयत्याचा धाक दाखवून दमदाटी केली. अन्य आरोपींनीही चालकाला शिवीगाळ करत मारहाण केली. त्यानंतर ऋतिक कदम आणि आदित्य कदम यांनी पिकअपचा मागील दरवाजा उघडला. गाडीतील सोन्या-चांदीचे दागिने आणि चांदीच्या विटा असलेले पोते जबरदस्तीने ताब्यात घेतले.

कोट्यवधींचा मुद्देमाल घेऊन आरोपी घटनास्थळावरून पसार झाले. भर महामार्गावर घडलेल्या या धाडसी दरोड्यामुळे पोलिसांसमोर मोठे आव्हान उभे राहिले. याप्रकरणी भुईंज पोलीस ठाण्यात गुन्हा दाखल करण्यात आला.

पोलिसांची चक्रे वेगाने फिरली; खबऱ्याने दिला महत्त्वाचा धागा!

घटनेचे गांभीर्य लक्षात घेऊन पोलीस अधीक्षक निखिल पिंगळे, अपर पोलीस अधीक्षक डॉ. वैशाली कडुकर आणि सातारा उपविभागाचे उपविभागीय पोलीस अधिकारी विपुल पाटील यांनी घटनास्थळी भेट दिली. अज्ञात आरोपींचा शोध घेऊन गुन्हा तातडीने उघड करण्याच्या सूचना देण्यात आल्या.

स्थानिक गुन्हे शाखेचे पोलीस निरीक्षक विश्वजीत घोडके यांनी तातडीने स्वतंत्र तपास पथके तयार केली. भुईंज आणि वाठार पोलीस ठाण्यांसह सातारा शहर व कराड शहरातील गुन्हे प्रकटीकरण पथकांचीही मदत घेण्यात आली. सीसीटीव्ही फुटेज तपासणे, तांत्रिक विश्लेषण करणे आणि संशयितांच्या हालचालींची माहिती मिळवणे, अशा विविध दिशांनी तपास सुरू झाला.

तपास सुरू असतानाच विश्वजीत घोडके यांना विश्वसनीय बातमीदारामार्फत मालगाव येथील काही संशयितांच्या हालचालींबाबत माहिती मिळाली. त्यानंतर पोलिसांनी संशयितांचा ठावठिकाणा शोधून त्यांना ताब्यात घेतले. चौकशीदरम्यान कुरिअरच्या गाडीची माहिती, दरोड्याचे नियोजन आणि प्रत्यक्ष लुटीतील सहभाग याबाबत महत्त्वाचे धागेदोरे मिळाले.

आठ जणांना बेड्या; कोट्यवधींचा मुद्देमाल हस्तगत

या प्रकरणात पोलिसांनी गोपीनाथ तानाजी कदम, मंगेश एकनाथ जाधव, ऋतिक रमेश कदम, आदित्य हणमंत कदम, सोमनाथ प्रमोद गोडसे, निखील दिलीप कदम आणि अक्षय शांताराम मोझर (सर्व रा. मालगाव, ता. जि. सातारा) तसेच निषीध शरद साबळे (रा. शिवथर, ता. सातारा) या आठ जणांना अटक केली आहे.

आरोपींकडून चोरीस गेलेले १ कोटी ५५ लाख २७ हजार २५८ रुपये किमतीचे सोन्या-चांदीचे दागिने आणि चांदीच्या विटा हस्तगत करण्यात आल्या आहेत. या प्रकरणाचा पुढील तपास पोलीस करत आहेत.

वरिष्ठांच्या मार्गदर्शनाखाली स्थानिक गुन्हे शाखेची धडाकेबाज कामगिरी

पोलीस अधीक्षक निखिल पिंगळे, अपर पोलीस अधीक्षक डॉ. वैशाली कडुकर, सातारा उपविभागाचे उपविभागीय पोलीस अधिकारी विपुल पाटील आणि वाई उपविभागाचे उपविभागीय पोलीस अधिकारी सुनील साळुंखे यांच्या मार्गदर्शनाखाली ही कारवाई करण्यात आली.

परिविक्षाधीन पोलीस उपअधीक्षक पुनम झगडे, स्थानिक गुन्हे शाखेचे पोलीस निरीक्षक विश्वजीत घोडके, सहायक पोलीस निरीक्षक पृथ्वीराज ताटे, सुशील भोसले, राजेश माळी, अभिजीत यादव, रोहित फार्णे, पोलीस उपनिरीक्षक परितोष दातीर, चंद्रकांत पुजारी, सूरज शिंदे, आकाश मोरे आणि स्थानिक गुन्हे शाखा व भुईंज पोलीस ठाण्यातील अधिकारी व अंमलदारांनी या कारवाईत सहभाग घेतला.

अवघ्या १२ तासांत दरोड्याचा छडा लावून कोट्यवधींचा मुद्देमाल हस्तगत केल्याबद्दल वरिष्ठ पोलीस अधिकाऱ्यांनी संपूर्ण तपास पथकाचे अभिनंदन केले.