वाईच्या गणपती घाटाची वयगावकरांकडून स्वच्छता; वाई तालुक्यासमोर आदर्श उपक्रम
वाई प्रतिनिधी, वाई, दि. १३ : वाईनगरीचे भूषण असलेला ढोल्या गणपती आणि कृष्णा नदीचा पवित्र घाट हा भाविकांचा श्रद्धास्थान म्हणून ओळखला जातो. दररोज असंख्य भक्तगण भक्तिभावाने या गणपतीचे दर्शन घेत असून कृष्णा घाटावरही मोठ्या प्रमाणात वर्दळ असते. मात्र गेल्या काही काळापासून घाट व परिसरात अस्वच्छतेचे साम्राज्य पसरले होते.
ही बाब लक्षात घेऊन वयगावकरांनी रविवार, दि. १३ डिसेंबर २०२५ रोजी सकाळच्या कडाक्याच्या थंडीत ढोल्या गणपती घाटाची व्यापक स्वच्छता मोहीम राबवली. स्वच्छता ही केवळ आपल्या गावापुरती मर्यादित न ठेवता, सर्वत्र पोहोचावी आणि घाणीच्या अंधकारातून मुक्ततेकडे वाटचाल व्हावी, या उद्देशाने हा उपक्रम हाती घेण्यात आला.
सौ. रुपाली परीट यांच्या संकल्पनेतून व मार्गदर्शनाखाली वयगावकरांनी एकत्र येत घाट परिसरातील कचरा, प्लास्टिक व घाण साफ करून परिसर स्वच्छ व सुंदर केला. या उपक्रमामुळे ढोल्या गणपती व कृष्णा घाटाचा परिसर पुन्हा एकदा पवित्र व रमणीय दिसू लागला आहे.
वयगावकरांनी राबवलेली ही स्वच्छता मोहीम वाई तालुक्यासाठी प्रेरणादायी ठरत असून, सामाजिक भान ठेवून नागरिकांनी एकत्र येऊन केलेले कार्य हे खऱ्या अर्थाने लोकसहभागातून स्वच्छतेचे उत्तम उदाहरण असल्याचे नागरिकांतून व्यक्त होत आहे.
