सौ.निलम खंडाईत यांना कराड पंचायत समितीचा आदर्श शिक्षक पुरस्कार जाहीर
गौरव कर्तृत्वाचा
कराड l जिल्हा परिषद प्राथमिक शाळा पेंबर, तालुका कराड येथील उपक्रमशील शिक्षिका सौ. निलम अमोल खंडाईत यांना पंचायत समिती कराड यांचा मानाचा समजला जाणारा आदर्श शिक्षक पुरस्कार जाहीर करण्यात आला आहे.
समाजाची नि:स्वार्थ भावनेने आणि निष्ठेने सेवा करणाऱ्या व शैक्षणिक क्षेत्रात उत्कृष्ट काम करणाऱ्या शिक्षकांना त्यांच्या अंगीकृत कामात प्रोत्साहन देण्याच्या व त्यांच्या गुणांचा यथोचित सन्मान करण्याच्या उद्देशाने पंचायत समिती कराड यांच्यावतीने हा पुरस्कार दिला जातो.
सौ. निलम खंडाईत यांनी आपल्या सेवेच्या कालावधीत विद्यार्थ्यांच्या शैक्षणिक गुणवत्तावाढीसाठी राबविलेल्या नाविन्यपूर्ण उपक्रमांची दखल घेऊन हा पुरस्कार त्यांना जाहीर झाला आहे.
शाळेची पटसंख्या वाढविण्यासाठी राबविलेले उपक्रम, विद्यार्थ्यांनी स्पर्धात्मक परीक्षेत मिळविलेले सुयश, स्काऊट
गाईड चळवळीत उल्लेखनीय कार्य आदी शैक्षणिक व सामाजिक कार्याची दखल घेऊन हा पुरस्कार त्यांना पंचायत समिती कराड यांच्यातर्फे मान्यवरांच्या हस्ते शुक्रवार दिनांक 6 सप्टेंबर रोजी प्रदान करण्यात येणार आहे.
