उरमोडी धरणाचे पाणी बंदिस्त पाईपलाईन मधून पोहचले खोडद बंधाऱ्यात !
भुईंज: महेंद्रआबा जाधवराव
उरमोडी धरणाचे पाणी सातारा तालुक्यालाही मिळाले पाहिजे ही तालुक्यातील जनभावना लक्षात घेऊन उरमोडी धरणाच्या उजवा कालव्यावर १० किलोमीटर खुला आणि उपळी येथून खोडद पर्यंत २२ किलोमीटर बंदिस्त पाईपलाईन करण्याचे काम मार्गी लावण्यासाठी भरीव निधी आमदार श्रीमंत छत्रपती शिवेंद्रसिंहराजे भोसले यांनी उपलब्ध करून घेतला होता. या कालव्याचे (एकूण ३२ किलोमीटर) काम नुकतेच पूर्ण झाले आहे.
या पाइपलाईनमधून पाणी सोडून चाचणी घेण्यात आली. पाणी थेट खोडद बंधाऱ्यात पोहचले. या नवीन बंदिस्त पाईपलाईनमुळे तालुक्यातील पोगरवाडी, उपळी, शेळकेवाडी, शिवाजीनगर, वेचले, भाटमरळीचा काही भाग, पाडळी, नागठाणे, अतित आणि खोडद आदी भागातील शेतीसाठी उरमोडी धरणाचे पाणी उपलब्ध झाले आहे. त्यामुळे या भागातील सिंचनासाठी आवश्यक असणाऱ्या पाण्याचा प्रश्न निकाली निघाला आहे. तालुक्यातील शेतकऱ्यांच्या मागणीला न्याय देता आला याचे मनस्वी समाधान वाटल्याची कृतार्थ भावना आमदार श्रीमंत छत्रपती शिवेंद्रसिंहराजे भोसले यांनी व्यक्त केली.
