भुईज येथे बुधवारी भव्य ऋषीपंचमी सोहळ्याचे आयोजन
भुईंज / प्रतिनिधी
भुईज येथे बुधवार दि. २० सप्टेंबर २०२३ रोजी कृष्णातिरी भव्य ऋषीपंचमी उत्सव सोहळा व स्नान पर्व नी सोहळा साजरा होणार राज्यभरातील महिला भाविक भुईज येथे आचार्य भृगूऋषी आश्रमात दाखल होणार.
हिंदू धर्मातील सर्वश्रेष्ठ ऋषी आचार्य भृगूमहर्षी यांच्या जिवंत समाधी स्थळाच्या आश्रमात व संथ वाहणा-या कृष्णा नदीच्या काठावर महिलांचा ऋषीपंचमी हा वृतवैकल्याचा सोहळा पारंपारिक व धार्मिक विधीने संपन्न होणार असल्याची माहिती आचार्य भृगुऋषी आश्रम दत्त सेवकरी मंडळ, ज्ञानेश्वरी पारायण मंडळ व महिला सेवेकरी मंडळ यांनी दिलेली आहे. महिलांच्या स्नान पर्वणी सोहळयासाठी भुईज येथील कृष्णानदीच्या काठावर व बांधीव प्राचीन घाटावर महिलांसाठी विशेष सुविधा करण्यात आलेली आहे.
पुरातन काळापासून गणेश चतुर्थीच्या दुस-या दिवशी ऋषीपंचमी हा महिलांचा उपवासाचा वृतवैकल्याचा सोहळा येत असतो. श्री क्षेत्र नारायणपूर येथील विश्व चैतन्य प. पू. श्री. सदगुरू नारायणमहाराज उर्फ आण्णा यांनी जिर्णोद्धारीत केलेल्या या आश्रमात दरवर्षी प्रमाणे यंदाही हा सोहळा साजरा होणार आहे. यावेळी सदगुरू आण्णा महाराज यांचे दर्शन प्रवचन होणार असून यावेळी पोपट महाराज स्वामी यांचेसह मान्यवर उपस्थित राहणार आहेत. कृष्णा नदीतील स्नान पर्वणी, अभिषेक, होमहवन, प्रवचन, दर्शन, सामुदायिक आरती व महाप्रसाद म्हणून महिलांसाठी फराळाचे वाटप होत असते. यासाठी श्री क्षेत्र नारायणपूर शिष्य परिवार व भुईज ग्रामस्थ विशेष परिश्रम घेत असतात.
यंदाच्या सोहळयाची तयारी पुर्ण झालेली असुन राज्यभरातून येणा-या महिलांसाठी कृष्णा नदीच्या घाटावर विशेष नियोजन केलेले आहे. तर आचार्य भृगूमहर्षीच्या समाधी स्थळावर व उत्सव मुर्तीचे दर्शन घेण्यासाठी खास सोय करण्यात आलेली आहे. तरी भाविकांनी याचा लाभ घ्यावा असे आवाहन श्री क्षेत्र नारायणपूर शिष्य परिवार, दत्त सेवेकरी मंडळ आचार्य भृगूऋषी आश्रम, ज्ञानेश्वरी पारायण मंडळ, श्री महालक्ष्मी देव व इतर देवस्थान ट्रस्ट, ग्रामपंचायत भुईज व भुईज ग्रामस्थांच्यावतीने करण्यात आलेले आहे.
भुईज कृष्णानदीच्या घाटावर महिलांसाठी खास व्यवस्था, सुरक्षा यंत्रणा, वैद्यकिय सुविधा तसेच महाप्रसाद व उपवासाचे फराळ वाटप यांचे महिला सेवेकरी व दत्त सेवेकरी यांच्या सहभागातून योग्य नियोजन केले असून सर्व महिलांनी याचा लाभ घ्यावा असे आवाहन भुईज ग्रामस्थांनी केले आहे.
भुईज पोलीस स्टेशनच्यावतीने येणा-या महिलांसाठी विशेष सुविधा पथक व हेल्पलाईन सुरू केली असल्याची माहिती भुईंज पोलीस स्टेशनचे सपोनि रमेश गर्जे यांनी माहिती दिली महिला स्वयंसेवक यांचे वेगळे पथक नदीपात्रात सज्ज ठेवण्यात येणार आहे.
